མནྜལ་སྒང་དེ་ རྩི་རང་རྫོང་ཁག་ནང་ལུ་ འགྱོགས་དྲགས་སྦེ་གོང་འཕེལ་འགྱོ་མི་རྒེད་འོག་ཅིག་ཨིན། ས་ཁོངས་ཀྱི་རྒྱ་ཚད་ ཧ་ལམ་ ཀི་ལོ་མི་ཊར་ ༡༥.༥ དེ་ཅིག་གྲུ་བཞི་ཡོདཔ་དང་ རྫོང་ཁག་ལྟེ་བ་འགྲམ་ཕུག་ལས་ ལྷོ་ཤར་ཁ་ཐུག་ལུ་ཀི་ལོ་མི་ཊར་ ༡༨ ཀྱི་ས་ཁོང་ནང་ཆགས་ཡོདཔ་ཨིན། རྒེད་འོག་གི་སའི་མཐོ་ཚད་དེ་ རྒྱ་མཚོའི་ཚད་ལས་ མི་ཊར་ ༧༠༠ ལས་ ༡༤༠༠ དེ་ཅིག་གི་ས་ཁར་ཨིནམ་དང་ གནམ་གཤིས་ཚ་དྲོད་རན་ཏོག་ཏོ་ཡོད་པའི་ཁར་ ས་བཅུད་ཡོདཔ་ལས་ འབྲུ་སྣ་དང། ཚོད་བསྲེ། ཤིང་འབྲས་ཀྱི་རིགས་ལྷམ་པ་མ་འདྲ་སྣ་ཚོགས་འཚོཝ་ཨིན།
རྒེད་འོག་དེའི་ནང་ སྤྱི་འོག་ལྔ་དང་ མི་རློབས་ ༢༩༠༠ དེ་ཅིག་ལུ་ཁྱིམ་གུང་ ༣༧༦ ཡོདཔ་ཨིན། མནྜལ་སྒང་གི་མི་སེར་ཚུ་གིས་དཔལ་འབྱོར་དང་འབྲེལ་བའི་ལཱ་ཚུ་ལེགས་ཤོམ་འབད་དོ་ཡོདཔ་དང་ ཁོང་གི་འཚོ་བ་དེ་ མང་ཤོ་རང་ས་ནམ་དང་ སྒོ་ནོར་གསོ་སྐྱོང་ལུ་བརྟེན་སྡོདཔ་ཨིན། ཁོང་གི་དངུལ་ཐོག་འོང་འབབ་གཙོ་བོ་ཅིག་ ཚལ་ལུ་དང། ཨ་ལཱན་ཅི། ཤིང་འབྲས་ཚུ་ཨིན། ཨིན་རུང་དངུལ་ཐོག་རྐྱངམ་ཅིག་གིས་མ་ཚད་པར་ གཞན་ཡང་ཚོད་བསྲེ་ཚུ་རྫོང་ཁག་གཞན་ལུ་བཙོངས་ཏེ་ ཁོང་རའི་འཚོ་བ་སྐྱོངམ་ཨིན།
གཞི་རྟེན་ཐུན་རྐྱེན་གྱི་ཐད་ རྒེད་འོག་ནང་ལུ་ སློབ་གྲྭ་ཆུང་གཅིག་དང་། སློབ་གྲྭ་བར་མ་གཅིག། རྒེད་འོག་ཡིག་ཚང་། རང་བཞིན་སླར་འབྱུང་ཐོན་སྐྱེད་ལྟེ་བ། གཞི་རྟེན་སྨན་ཁང་། གྲོང་གསེབ་སྨན་ཁང་། གཞི་རྟེན་ཤེས་ཡོན་ལྟེ་བ་ ༢ ། ས་ཁོངས་གཞན་ཅིག་ཁར་བཞེངས་ཡོད་པའི་ལྷ་ཁང་བཅས་ཡོདཔ་ཨིན། མི་ཚུ་གིས་ ཐུན་རྐྱེན་དེ་ཚུ་གི་ཁེ་ཕན་ལེན་ཏེ་ ཁོང་རའི་དགོས་མཁོ་དང་བསྟུན་པའི་ཞབས་ཏོག་ཚུ་ཡང་ལེནམ་ཨིན། རྒེད་འོག་ནང་མི་སེར་ཚུ་ལུ་ ཡོངས་འབྲེལ་དང་ ཡོངས་འབྲེལ་མེད་པའི་མཐུན་རྐྱེན་སྤྲོད་ནིའི་དོན་ལུ་ མི་སྡེའི་ལྟེ་བ་གསརཔ་ཡང་གཞི་བཙུགས་འབད་དེ་ཡོདཔ་ཨིན།
སྐྱེལ་འདྲེན་དང་བརྒྱུད་འབྲེལ་གྱི་ཐད་ རྒེད་འོག་ནང་ལུ་ མནྜལ་སྒང་ལས་ ཐིམ་ཕུག་ མི་དམངས་སྐྱེལ་འདྲེན་བཱསི་གི་ཞབས་ཏོག་དང་ གླ་འཁོར་ཚུ་ཡོདཔ་ཨིན། མི་སེར་ཚུ་གི་ས་ནམ་ཐོན་ཁུངས་ཚུ་འཇམ་ཏོག་ཏོ་སྦེ་སྐྱེལ་འདྲེན་འབད་ཚུགས་ནིའི་དོན་ལུ་ རྒེད་འོག་གིས་ ཞིང་ལམ་ ༤ ཀི་ལོ་མི་ཀྲར་ ༡༡ དེ་ཅིག་གསར་བཏོན་འབད་ཡོདཔ་ཨིན། རྒེད་འོག་དེའི་ནང་ བི་མོ་བའིལ་ཞབས་ཏོག་ སྤྱི་ལོ་ ༢༠༠༨ ནང་མཐུདཔ་ཡོདཔ་དང་ བཀྲིས་སེལ་ཞབས་ཏོག་དེ་ སྤྱི་ལོ་ ༢༠༡༠ ནང་མཐུདཔ་ཡོདཔ་ཨིན། མནྜལ་སྒང་རྒེད་འོག་ནང་གི་སྤྱི་འོག་ག་རའི་ནང་གློག་མེ་ལྷོད་ཡོདཔ་ལས་ མི་སེར་ཚུ་གློག་མེའི་ཞབས་ཏོག་དགའ་སྐྱིད་ངང་ལུ་སྤྱོད་ཡོདཔ་ཨིན།
རྒེད་འོག་འདི་ རྩི་རང་རྫོང་ཁག་ནང་ལུ་ ཚལ་ལུ་མང་ཤོས་བཙུགས་མི་རྒེད་འོག་ཅིག་ཨིན།
